#norgstr bitmynt stenger. Fra nettsiden til bitmynt: «Bitmynt stengjer ned vekslingstenesta
Då eg starta opp mi enkle vekslingsteneste i 2010, var det nesten umogeleg å veksle mellom BTC og NOK. Tenester som MtGox eksisterte, men mangla bankkonto og var difor nesten umogeleg å handle på. Elles var ein avhengig av å finne nokon på Bitcointalk eller IRC. Ingen andre norske veksla.
Eg byrja å tilby veksling på IRC-kanalen #bitcoin-otc. Der er eg framleis den einaste med over 1000 i samla rating:
Hausten 2013 tente eg mykje meir på robothandel enn på min vanlege jobb, og omsetnaden hadde teke seg opp kraftig. Då sa eg opp jobben for å starte Bitmynt AS og for å drive med bitcoinhandel på fulltid.
Derifrå starta ein lang kamp mot bankane. Eg vil ikkje gå i detaljar om den her. Det vert ein annan gong.
Frå og med den 15. oktober 2018 kom Bitcoin under kvitvaskingslova. Eg dreiv framleis handelen som privatperson, men måtte forhalde meg til den. Finanstilsynet kom med på laget, og eg fekk endeleg bankkonto. I 2019, etter 6 års kamp mot bankar og med haugevis av stengde bankkonti, oppsagde kundeforhold og ei rettssak mot Nordea bak meg, kunne eg endeleg starte Bitmynt AS og tilsetje folk!
Målet var å starte ei teneste som kunne gjere bitcoin-brukarar uavhengige av norsk bankkonto, men utan å oppbevare bitcoin for kundar. Vi skulle tilby veksling, rekningsbetaling, lønsutbetaling for bedrifter og måtar tredjepartar kunne sende oss NOK for veksling til BTC som kunden vår kunne motta til si private lommebok med sine private nøklar. Alt dette var mogeleg innanfor kvitvaskingslova frå 2018. Sovidt eg kan sjå, er det framleis mogeleg etter MiCA, men veldig mykje vanskelegare.
Vi kom ikkje i mål. Det er mange grunnar til dette. Ein vesentleg grunn var at eg sjølv hadde fått blodkreft og fekk stadig mindre energi, og trudde sjølv at eg var utbrend. Kreften vart diagnostisert i desember 2020. No er kreften gradvis på veg ut av kroppen, for det finst heldigvis god medisin, men medisinen har òg biverknader. Kreften kom på verst mogelege tidspunkt.
Frå 1. juli vert MiCA innført i Noreg. Den set veldig mykje strengare krav til vekslingstenester. Det er i praksis ikkje lenger mogeleg å drive ei enkelt vekslingsteneste, frå no av er regelverket like strengt som for finansinstitusjonar.
Mitt ynskje var aldri å verte nokon form for bank. Eg skulle drive ei enkel vekslingsteneste.
Dei siste åra har vi heldigvis fått fleire konkurrentar. Det har vore viktig for meg, for no er vi ikkje lenger eitt svakt punkt som bankane kan gå til åtak på for å i praksis forby bitcoin i Noreg. Eg har støtta fleire av dei med likviditet og investeringar. Difor er det heilt greitt å setje punktum no. Det vil framleis vere mogeleg å veksle mellom bitcoin og norske kroner i Noreg utan meg. Vi har difor valt å ikkje søkje om konsesjon etter MiCA, med alle formalitetane som må på plass og alt byråkratiet og jussen rundt.
Den 16. juni 2026 er det difor slutt. Då har vi eit par veker til å rydde opp. Alle opne ordrar vert gjorde opp i løpet av dei næraste vekene. Nettsidene vert verande ei stund til, slik at de kan hente ut historikk. Noko nedetid må påreknast i juli, fordi vi må omorganisere maskinparken og redusere utgiftene.
Fleire har teke kontakt for å kjøpe kundane våre. Det er ikkje aktuelt. I personvernvilkåra våre står det at vi ikkje utleverer informasjon om kundane våre til nokon, med mindre lova krev det. Andre har vore ute etter å kjøpe selskapet med kundane. Det ville vore å omgå vilkåret. Eg har difor bestemt meg for å heller ikkje gjere det, trass i at eg då ville fått att mykje av det eg har investert i Bitmynt. Vi stengjer i staden butikken permanent. Kundeinformasjon vert sletta so snart vi har lov til det.
I staden har vi fått på plass ei heilt frivillig ordning med Bare Bitcoin. Bare Bitcoin er òg ei enkel vekslingsteneste, som i tillegg tilbyr oppbevaring og ein app. Dersom du registrerer deg via lenkja, får du bb+ i 6 månader. Det vil seie at du får gratis handel for opptil 21 000 kroner kvar månad, gratis uttak, litt raskare kundestøtte og meir som vert annonsert snart. Dette er eit veldig godt tilbod! Vi deler ingen personinformasjon med Bare Bitcoin, dei ser berre at du kjem frå denne lenka: 
Det har vore litt av ei reise, men alle reiser har ein ende. No er det på tide for oss å gå vidare til andre ting. Bitcoin lever fint vidare utan Bitmynt. Takk for oss og takk for handelen!
– Sturle Sunde»
#bitcoin-otc web of trust data
Du har blitt invitert!
Bitmynt AS har gitt deg opptil 110 kroner i gratis avgifter og cashback for å komme i gang med bitcoin.
#RUNSTR #Walking
#RUNSTR #Strength